ليه أرقام مدير الإعلانات مختلفة عن مبيعاتك الحقيقية؟ (4 أسباب والحل)
آخر الشهر بيجي، وصاحب البيزنس بيبعتلك رسالة: «ميتا بتقول
40 أوردر، وأنا شايف 23 في الموقع. إحنا بنشتغل صح؟»
وهنا بيبدأ نقاش مش بينتهي، وكل طرف مقتنع إن التاني بيجمّل
الصورة أو بيقلل من شغله.
الحقيقة اللي محدش بيقولها: ولا واحد فيهم بيكدب. الاتنين
بيقولوا الحقيقة، بس كل واحد بيعدّ بطريقة مختلفة.
وفهم الفرق ده مش رفاهية — هو اللي بيحدد إنت بتاخد قراراتك
على أنهي رقم.
خلّيني
أقرّبهالك بمثال من الشارع
تاجر وزّع فلايرات في المنطقة، وحط لافتة كبيرة على المحل،
ونزّل إعلان في جريدة محلية.
جه زبون واشترى. تسأله جه منين؟
الفلاير هيقولك «أنا اللي جبته». اللافتة هتقولك «لا، هو
شافني وهو ماشي». الجريدة هتقولك «هو أصلاً عرف بيا».
كلهم صح جزئيًا، ومجموعهم أكبر من الحقيقة. ده بالظبط اللي
بيحصل بين المنصات الإعلانية ولوحة متجرك.
السبب الأول:
نافذة النسب (Attribution Window)
المنصة بتحسب العملية على الإعلان لو حصلت خلال فترة معينة
من التفاعل معاه — عادة 7 أيام من الضغط، ويوم واحد من المشاهدة.
يعني إيه عمليًا؟ حد ضغط على إعلانك يوم السبت، وقعد يفكّر،
ورجع اشترى يوم الخميس. ميتا هتقولك «دي نتيجة إعلاني»، وهتسجّلها في اليوم اللي
حصل فيه الضغط. ولوحة المتجر هتسجّلها يوم الخميس عادي.
نفس العملية، يومين مختلفين، وتقريرين مختلفين.
اعمل إيه؟
افتح إعدادات النسب في الحملة وشوف النافذة شغالة على كام
يوم. أغلب الناس عمرها ما فتحت المكان ده أصلًا، وبتقارن أرقام وهي مش عارفة
القاعدة اللي المنصة بتحسب بيها.
السبب
التاني: كل منصة بتنسب الأوردر لنفسها
الزبون شاف إعلانك على تيك توك، وبعدها بيومين وصله إعلان
تذكير على إنستجرام، ودخل واشترى.
تيك توك هتقولك «أنا»، وميتا هتقولك «أنا». والاتنين مش
بيكدبوا — كل واحد شايف الجزء اللي حصل عنده بس.
والنتيجة الخطيرة: لو جمعت أرقام المنصات على بعض، هيطلعلك
رقم مبيعات أكبر من الحقيقي، وممكن تاخد قرار بزيادة ميزانية بناءً على مكسب وهمي.
القاعدة اللي لازم تمشي عليها: أرقام المنصات مابتتجمعش.
السبب
التالت: جزء من الأرقام تقديري مش محسوب
بعد قيود الخصوصية اللي اتفرضت على تتبّع المستخدمين، جزء
من التحويلات مابيوصلش للمنصة أصلًا. فالمنصة بتستخدم النمذجة (Modeling) — يعني
بتقدّر عدد التحويلات المفقودة بناءً على بيانات إحصائية.
التقدير ده مفيد على مستوى الاتجاه العام، لكنه مش رقم
محاسبي. ماينفعش تبني عليه فاتورة ولا تحسب بيه أرباح.
السبب
الرابع: فرق التوقيت في التسجيل
المنصة بتسجّل النتيجة في يوم التفاعل مع الإعلان. المتجر
بيسجّلها في يوم الشراء الفعلي.
لو بتقارن يوم بيوم، هتلاقي فرق دايمًا وأبدًا. المقارنة
الصح بتكون على مدى 7 أو 30 يوم، لأن الفروق التوقيتية بتتوازن على المدى الأطول.
اعرف اكتر عن ازاي تستخدم الـ UGC في تسويق شركتك وتكسب ثقة العملاء؟
يبقى نعمل إيه؟ 3 خطوات تريّح دماغك
1. اختار مصدر واحد للحقيقة
قبل ما الحملة تشتغل أصلًا، اتفق مع العميل أو مع نفسك:
أنهي رقم هو المعتمد للمحاسبة؟
في أغلب الحالات، المصدر ده هو لوحة المتجر أو النظام
المحاسبي — لأنه اللي فيه فلوس حقيقية دخلت. أرقام المنصات بتفضل أداة للتحسين
والقرارات اليومية، مش للمحاسبة.
2. حط روابط تتبّع لكل إعلان
استخدم روابط UTM لكل حملة وكل إعلان. كده لوحة التحليلات
بتاعتك هتقولك كل أوردر جه من فين فعلًا، من غير ما تعتمد على كلام المنصة عن
نفسها.
الخطوة دي بتاخد 10 دقايق في التجهيز، وبتحل 80% من النقاش
ده للأبد.
3. قيس الصورة الكبيرة
في مؤشر بسيط ومبيكدبش: إجمالي اللي صرفته على الإعلانات ÷
إجمالي المبيعات في نفس الفترة.
المؤشر ده مبيهتمش مين نسب الأوردر لنفسه. بيقولك: صرفت
كذا، دخلّي كذا. وده الرقم اللي بيحدد لو البيزنس بيكسب ولا لأ.
أسئلة شائعة
ليه ميتا
بتقول أوردرات أكتر من الموقع؟
بسبب نافذة النسب اللي بتحسب العمليات اللي حصلت بعد أيام
من الضغط، ونسبة من التحويلات بتكون مُقدّرة بالنمذجة، بالإضافة لاحتمال نسب نفس
العملية على أكتر من منصة.
أنهي رقم
أعتمد عليه في المحاسبة؟
اعتمد على المصدر اللي فيه فلوس فعلية: لوحة المتجر أو
النظام المحاسبي. أرقام المنصات استخدمها للتحسين وتوجيه الميزانية، مش للمحاسبة
النهائية.
هل أجمع
أرقام المنصات على بعض؟
لأ. كل منصة بتنسب العملية لنفسها، فالجمع بيطلّع رقم أكبر
من المبيعات الحقيقية.
الفرق
المقبول بين الرقمين قد إيه؟
مفيش رقم قياسي ثابت، بيختلف حسب نوع النشاط ودورة الشراء
ونسبة المشتريات المتكررة. المهم إن الفرق يكون ثابت ومفسّر — لو فجأة اتغير بشكل
كبير، يبقى في مشكلة في القياس تستاهل مراجعة.
الفرق بين أرقام مدير الإعلانات ومبيعاتك الحقيقية مش دليل على غش ولا فشل — هو نتيجة طبيعية لاختلاف طرق القياس
اللي بيفرّق بين مسوّق محترف وغيره إنه بيتفق على مصدر
الحقيقة قبل الحملة مش بعد الخناقة، وبيفهم كل رقم بيستخدمه في إيه.
لو عايز مساعدة في ضبط القياس في حسابك الإعلاني أو في
تدريب فريقك على قراءة التقارير صح، تقدر تتواصل معايا
كنت معاكم أحمد صبري خبير واساشلري تسويقي ومسوق ومحاضر ومدرب في التسويق الرقمي الاحترافي للافراد والشركات